Rosenberg-sjefen: – Det kjem til å jobba 1500 personar på prosjektet neste år

– No startar den store jobben, sa olje- og energiminister Tina Bru då ho feira Jotun-oppdraget saman med leiarar og tilsette hos Rosenberg.

Produksjons- og lagringsskipet Jotun A la til kai ved Rosenberg Verft den 30. juni. Verftet skal rusta opp det 233 meter lange og 42 meter breie skipet på oppdrag for oljeselskapet Vår Energi.

– Det kjem til å jobba 1500 personar på prosjektet når det er på topp neste år, seier verftsdirektør Jan T. Narvestad i Rosenberg Worley.

Torsdag markerte Stavanger-verftet starten på det store oppdraget med taler, kake og ministerbesøk.

– Det er 20 år sidan me har hatt en så stor jobb, seier Narvestad.

Klar for det grøne skiftet

Erlend Nygård er klubbleiar for nærare 350 fagorganiserte i Fellesforbundet på verftet.

Annonsørinnhold

– Oppdraget betyr veldig mykje for oss. Det er eit stort prosjekt som vil bidra til god sysselsetting framover.

– Oljenæringa har mellom anna argumentert med at dei er ein nødvendig del av det grøne skiftet når dei har bede om å få støtte gjennom koronakrisa. Kva rolle trur du eit prosjekt som dette kan spela for det grøne skiftet?

– Om det ikkje finst store industribedrifter som dette, så er det ingen som kan handtera dei jobbane som må bli gjort for å handtera det grøne skiftet. Me treng å halda oppe drifta for å kunna investera i nye prosjekt, som til dømes havvind. Så står me klare til å ta vår del av det grøne skiftet. Eg skulle ønska det grøne skiftet var her no. Men dei grøne prosjekta treng tid til å modna før me kan bygga dei, seier Nygård.

Skryt frå ministeren

– No begynner den store jobben, seier olje- og energiminister Tina Bru idet ho startar talen til dei frammøtte.

Ho nyttar høvet til å skryta av Jotun-oppussinga, som er ein del av Balder Future-prosjektet til Vår Energi og Mime Petroleum. Desse investerer 19 milliardar kroner for å rusta opp Balder-området i Nordsjøen. Ministeren set stor pris på at dei vil bruka ressursar på å gje området lengre levetid.

– Olje og gass er sjølve motoren i norsk økonomi. Næringa har ei lys framtid med nye moglegheiter, seier Bru og ønskjer dei frammøtte lykke til med arbeidet.

Teknologiutvikling

Medan det regnar skrått over dei kakespisande gjestene, spør Aftenbladet kva Bru ser om ho ser prosjektet i lys av det grøne skiftet.

– Dette er teknologiutvikling som kjem godt med i det grøne skiftet. Ein tener ikkje pengar på havvind i fyrste omgang, så prosjekt som dette held kjernekompetansen gåande, svarer ministeren.

Aktørar i havvind-bransjen håper på meir støtte gjennom statsbudsjettet for å kunna satsa på flytande havvind i Noreg. Rosenberg er i gang med å utvikla eit eige prosjekt innan flytande havvind.

– Eg kan ikkje lova noko. Det er så mange som treng statleg støtte, seier Bru før ho og aktørar frå Rosenberg og Vår Energi går av garde for å sjå det rustne oppussingsobjektet frå innsida, utan pressa på slep.

Start dagen med

Hold deg oppdatert på de viktigste nyhetene, de siste nøkkeltallene, og dagens kalender. Tilbudet er gratis.

Meld deg på nyhetsbrevet her

Annonsørinnhold